आय–व्यय नबुझाउने ६ दलले पनि दल दर्ता निवेदन दिए, आयोग दोधारमा

आर्थिक वर्ष २०८०/८१ को आय–व्यय विवरण नबुझाएर निर्वाचन आयोगले जरिवाना तोकेका ६ राजनीतिक दलले पनि आगामी निर्वाचनका लागि दल दर्ता निवेदन दिएका छन्।

दल दर्ता निवेदन दिने दलहरूमा अखण्ड सुदूरपश्चिम पार्टी नेपाल, संघीय विकासवादी पार्टी नेपाल, गान्धीवादी पार्टी नेपाल, संघीय नेपाल पार्टी, नेपाल मातृभूमि पार्टी र राष्ट्रवादी युवा मोर्चा छन्।

यी सबै दलले समयमै वार्षिक आय–व्यय विवरण नबुझाएपछि आयोगले जरिवाना तोकेपनि, उनीहरू पुनः दल दर्ताका लागि आयोगमा पुगेका छन्। यसले आयोगलाई नयाँ संवैधानिक र प्रशासनिक चुनौती खडा गरेको छ।

हाल आयोगले गत आर्थिक वर्षको आय–व्यय विवरण बुझाउने समय आगामी माघसम्म दिएका कारण उपलब्ध समयको सन्दर्भमा यस्ता दलको दर्ता प्रक्रिया अघि बढाउने कि नबढाउने भन्ने विषयमा आन्तरिक छलफल चलिरहेको छ।

यसअघि अघिल्लो आर्थिक वर्षको विवरणसमेत नबुझाएका केही दलहरूमाथि जरिवाना तोकिएको छ। ती दलहरूले जरिवाना नबुझाइ दर्ता निवेदन दिंदा आयोग थप अन्योलमा परेको हो।