भेनेजुएलाको राजधानी काराकासमा अमेरिकाले हमला गरेको खबर सार्वजनिक भएको छ। शनिबार बिहान स्थानीय समय अनुसार करिब १:५० बजे पहिलो विस्फोट भएको बताइएको छ। अमेरिकी समाचार संस्था सीएनएनका अनुसार काराकासका विभिन्न स्थानमा एकपछि अर्को गर्दै शक्तिशाली विस्फोटहरू भएका हुन्।
सीएनएनकी संवाददाता ओस्मारी हर्नान्डेजले एक विस्फोट यति शक्तिशाली रहेको बताएकी छन् कि त्यसको असरले उनको झ्यालसमेत हल्लिएको थियो। विस्फोटपछि शहरका केही भागमा विद्युत् आपूर्ति अवरुद्ध भएको छ भने ला कार्लोटा विमानस्थल नजिकैबाट धुवाँको मुस्लो उठेको देखिएको छ।
सामाजिक सञ्जालमा सार्वजनिक भएका भिडियोहरूमा रातको आकाशमा दुईवटा धुवाँका मुस्लो देखिएका छन्, जसमा एउटा स्थानबाट सुन्तला रंगको चमक देखिन्थ्यो। राजधानी बाहिरका क्षेत्रहरू—ला ग्वाइरा राज्य र मिरान्डा राज्यको हिगुएरोटे शहरमा पनि विस्फोटको आवाज सुनिएको स्थानीय सञ्चारमाध्यमहरूले जनाएका छन्।
यो घटना अमेरिका र भेनेजुएलाबीच बढ्दो तनावको पृष्ठभूमिमा भएको हो। यसअघि अमेरिकी राष्ट्रपति डोनाल्ड ट्रम्पले भेनेजुएलामा सक्रिय लागुऔषध तस्करी सञ्जालविरुद्ध कडा कारबाही गर्ने चेतावनी दिएका थिए। उनले छिट्टै स्थल आक्रमण सुरु हुने संकेत दिएलगत्तै यी विस्फोटहरू भएको बताइएको छ।
प्रतिक्रिया