साउदी अरेबियामा मिसाइल खस्दा २ जनाको मृत्यु, १२ घाइते

4

साउदी अरेबियाको अल–खर्ज सहरस्थित एक आवासीय क्षेत्रमा मिसाइल खस्दा कम्तीमा दुई जनाको मृत्यु भएको छ भने १२ जना घाइते भएका छन्। साउदी अधिकारीहरूका अनुसार घटनामा एक भारतीय र एक बंगलादेशी नागरिकको मृत्यु भएको हो।

यो घटना खाडी क्षेत्रमा रहेका अमेरिकी सैन्य सम्पत्तिलाई लक्षित गर्दै इरानले गरिरहेको प्रत्याक्रमण दोस्रो सातामा प्रवेश गरेको बेला भएको बताइएको छ।

साउदी नागरिक सुरक्षा निकायले आइतबार सामाजिक सञ्जाल एक्समा पोस्ट गर्दै कुनै देशको नाम नलिई सैन्य प्रक्षेप्य अल–खर्जको एक आवासीय क्षेत्रमा खसेको जनाएको छ।

यसअघि इरानको इस्लामिक रिभोलुसनरी गार्ड कोर्प्स (आईआरजीसी) ले अल–खर्ज गभर्नरेटसहित विभिन्न स्थानका राडार प्रणालीलाई लक्षित गरी आक्रमण गरेको दाबी गरेको थियो। अल–खर्ज क्षेत्रमा अमेरिकी सेनाले प्रयोग गर्ने प्रिन्स सुल्तान एयरबेस रहेको छ, जसलाई पछिल्लो एक सातादेखि संयुक्त राज्य अमेरिका र इजरायलले इरानविरुद्ध सञ्चालन गरेको युद्धका क्रममा पटक–पटक लक्ष्य बनाइएको छ।

दोहाबाट रिपोर्ट गर्दै अल जजीराकी पत्रकार लाउरा खानका अनुसार प्रक्षेप्य मर्मत तथा सरसफाइ सेवा दिने कम्पनीको आवासीय क्षेत्रमा खसेको थियो। उनका अनुसार खाडी क्षेत्रभर सर्वसाधारणका लागि अवस्था झन् अस्थिर र खतरनाक बन्दै गएको छ।

‘यहाँ २०० भन्दा बढी देशका नागरिक काम र बसोबास गरिरहेका छन्, जसमा धेरै श्रमिक छन्,’ उनले बताइन्।

यसैबीच साउदी रक्षा मन्त्रालयले राजधानी रियादको कूटनीतिक क्षेत्रतर्फ लक्षित १५ वटा ड्रोन खसालिएको जनाएको छ। उता कुवेतले आफ्नो अन्तर्राष्ट्रिय विमानस्थलको इन्धन ट्यांकीमा आक्रमण भएको जनाएको छ भने बहराइनले पानी शुद्धीकरण (डिसालिनेसन) प्लान्टमा क्षति पुगेको जानकारी दिएको छ।

यी आक्रमणहरू त्यसपछि भएका हुन्, जब इजरायली युद्ध विमानहरूले इरानको राजधानी तेहरान वरपर रहेका पाँच तेल प्रशोधन केन्द्रमा आक्रमण गरेका थिए। एक सरकारी तेल अधिकारीका अनुसार उक्त आक्रमणमा केही मानिसको मृत्यु भएको छ र राजधानी क्षेत्रमा बाक्लो धुवाँ फैलिएको छ।

आईआरजीसीका एक प्रवक्ताले इरानको ऊर्जा पूर्वाधारमा अमेरिका र इजरायलले आक्रमण जारी राखे प्रतिशोध लिने चेतावनी दिएका छन्। उनले भने, “यदि प्रतिब्यारेल २०० डलरभन्दा माथिको तेल मूल्य सहन सक्नुहुन्छ भने यो खेल जारी राख्नुहोस्।”

युद्ध नवौं दिनमा प्रवेश गर्दा आईआरजीसीले मध्यपूर्वभर ड्रोन र मिसाइल आक्रमण ६ महिनासम्म जारी राख्न पर्याप्त आपूर्ति रहेको दाबी गरेको छ।

उता अरब लिगका महासचिव अहमद अबुल घैतले सदस्य राष्ट्रहरूमाथि इरानले गरेको आक्रमणलाई लापरवाहीपूर्ण भन्दै तेहरानलाई ठूलो रणनीतिक गल्ती सच्याउन आग्रह गरेका छन्।

इरानको स्वास्थ्य मन्त्रालयका अनुसार फेब्रुअरी २८ देखि अमेरिका र इजरायलले सुरु गरेको युद्धपछि हालसम्म कम्तीमा १,२०० सर्वसाधारणको मृत्यु भएको छ भने करिब १० हजार जना घाइते भएका छन्।