लालकिल्ला विस्फोट: आरोपी उमरले पार्किङमै तीन घण्टा बस्दै बम जोडेका रहेछन्

दिल्लीमा नोभेम्बर १० मा भएको लालकिल्ला नजिकको भीषण विस्फोट सम्बन्धी ठूलो तथ्य बाहिर आएको छ। अनुसन्धान स्रोतहरूको अनुसार, विस्फोटका मुख्य आरोपी डा. उमर मुहम्मद ले लालकिल्ला मेट्रो स्टेशन नजिकैको सार्वजनिक पार्किङ क्षेत्रमै तीन घण्टा बसेर विस्फोटक पदार्थहरू जोड्ने काम गरेका थिए। उमरले चलाइरहेको हुन्डाई I-20 कार जम्मु–कश्मीरको पुलवामा निवासी उनको नाममा दर्ता थियो। हरियाणाको नम्बर प्लेटमा चलाइएको यो कार गेट नम्बर १ नजिक अचानक विस्फोट हुँदा उच्च सुरक्षा क्षेत्र समेत हल्लिएको थियो।

३ घण्टाको रहस्य

रेकर्डअनुसार कार दिउँसो ३:१९ बजे पार्किङमा छिर्‍यो र साँझ ६:२२ बजे मात्र बाहिर निस्कियो। यो अवधिभर उमर गाडीबाट एकछिन पनि बाहिर निस्केनन्।
अहिले अनुसन्धान निम्न प्रश्नहरूमा केन्द्रित छः

• के उनी फोनमार्फत ह्यान्डलरसँग निरन्तर सम्पर्कमा थिए?
• के दिल्ली वा फरीदाबादमा कसैले उनलाई निर्देशित गरिरहेको थियो?
• के लालकिल्ला वरपरको निगरानी (रि–की) गर्ने योजना थियो?
• भीड बढ्ने समय कुरेर थप क्षति पुर्‍याउने रणनीति थियो?

अनुसन्धानकर्ताहरूले इन्टरनेट गतिविधि असामान्य रूपमा बढेको जानकारी दिएका छन्, जसले घटनाको बेला ह्यान्डलरसँगको सम्भावित संचार पुष्टि गर्छ।

योजना बदलियो

उमर र उनको समूहले सोमबार लालकिल्ला बन्द हुने थाहा पाएका थिएनन्। पार्किङ सुनसान भएपछि उनीहरूले त्यही विस्फोट गर्ने योजना त्यागे।
त्यसपछि उनीहरूले लालकिल्ला र चाँदनी चौक जोड्ने नेताजी सुभाष मार्ग चुने। पार्किङ छोडेपछि केही समयमै कारमा रिमोटबाट विस्फोट गरियो।

विस्फोटमा १३ जनाको मृत्यु र २० जना घाइते भए।

के उमर पर्खिरहेका थिए?

सुरक्षा एजेन्सीहरूलाई अझै कयौँ शंका बाकिँ छन्—

• के उमर कुनै स्लीपर सेल सदस्यको पर्खाइमा थिए?
• के लजिस्टिक सहयोग वा अन्तिम निर्देशनका लागि ३ घण्टा जोखिम उठाए?
• मोड्युलभित्र कसैको गिरफ्तारिले उनलाई समयभन्दा अघि विस्फोट गराउन बाध्य बनायो?

आतंक नेटवर्कको खोजी तीव्र

दिल्ली प्रहरी र केन्द्रीय एजेन्सीहरूले उमरसम्बन्धी गतिविधिलाई जम्मु–कश्मीर र हरियाणामा जरा गाडेको विस्तारित आतंक नेटवर्कसँग जोडेर अनुसन्धान गरिरहेका छन्।
उनीहरूले प्रयोग गरेको टेलिग्राम समूह, सम्भावित स्लीपर सेल र प्रयोग गरिएका विस्फोटक पदार्थको स्रोत पहिचानका लागि खोजी अझ तीव्र बनाइएको छ।

अधिकारहरूले भनेका छन्,
“यस नेटवर्कको बाँकी संरचना पत्ता लगाउने र पूर्ण र्‍याकेट भण्डाफोर गर्ने काम अन्तिम चरणतिर छ।”