जर्मनीमा १० बिरामीको हत्या गर्ने नर्सलाई आजीवन कारावास, २७ जनाको हत्या प्रयासमा समेत दोषी ठहर

जर्मनीमा एक उपशामक हेरचाह नर्सलाई १० जना बिरामीको हत्या र २७ जनाको हत्या प्रयास गरेको अभियोगमा आजीवन कारावासको सजाय सुनाइएको छ।

सार्वजनिक रूपमा नाम नखुलाइएको उक्त नर्सले रातको शिफ्टमा कामको बोझ घटाउन आफ्ना वृद्ध बिरामीहरूलाई दुखाइ निवारक र शामक औषधिको ठूलो मात्रा सुई लगाउने गरेको अभियोग लागेको थियो।

यो घटना पश्चिमी जर्मनीको वुर्सेलेनस्थित एक अस्पतालमा २०२३ डिसेम्बरदेखि २०२४ मेबीच भएको हो। अनुसन्धानकर्ताहरूले अहिले पनि नर्सको करियरका अन्य शंकास्पद घटनाहरूको अनुसन्धान जारी राखेका छन्।

फ्रान्सेली समाचार एजेन्सी एएफपीका अनुसार, उक्त व्यक्ति २००७ मा नर्सिङ पेशेवरको रूपमा प्रशिक्षण लिएर २०२० देखि वुर्सेलेन अस्पतालमा कार्यरत थिए।

अभियोजकहरूले अदालतलाई जानकारी दिँदै भनेका छन् कि उनले उच्च हेरचाह आवश्यक पर्ने बिरामीहरूप्रति सहानुभूति र दया नदेखाई ‘जीवन र मृत्युको मालिक’ बनेर खेल खेलेका थिए।

रातको पालीमा आफ्नो जिम्मेवारी कम गर्न उनले मोर्फिन र मिडाजोलमजस्ता शक्तिशाली औषधि अत्यधिक मात्रामा सुई लगाउने गरेको बताइएको छ। उनलाई सन् २०२४ मा पक्राउ गरिएको थियो।

अदालतले सजाय सुनाउँदा उक्त अपराधलाई “विशेष गम्भीर प्रकृतिको” मानेको छ र नर्सलाई १५ वर्षभन्दा पहिले रिहा गर्न नपाइने निर्णय गरेको छ। उनले भने फैसलाको पुनरावेदन गर्न सक्ने छन्।

अभियोजकहरूले थप सम्भावित पीडितहरूको पहिचानका लागि कब्र उत्खनन कार्य जारी रहेको बताएका छन्।

यो घटना सन् २०१९ मा जर्मनीकै पूर्व नर्स निल्स होगेलको घटनासँग मिल्दोजुल्दो छ, जसलाई ८५ बिरामीको हत्या गरेको अभियोगमा आजीवन कारावासको सजाय सुनाइएको थियो।

निल्स होगेल जर्मनीको आधुनिक इतिहासमा सबैभन्दा कुख्यात श्रृंखलाबद्ध हत्यारा मानिन्छन्।