हर्क साम्पाङ नेतृत्वको श्रम संस्कृति पार्टी पाँच महिनामै राष्ट्रिय दलको रूपमा स्थापित भएको छ।
धरान उपमहानगरपालिकाका प्रमुख रहेका साम्पाङले गत असोज १२ गते निर्वाचन आयोग नेपालमा नयाँ राजनीतिक दल दर्ताका लागि निवेदन दिएका थिए। आयोगले कात्तिक १६ गते पार्टी दर्ता गरी उनलाई आधिकारिक प्रमाणपत्र प्रदान गरेको थियो। पार्टीको चुनाव चिह्न ‘माटो’ राखिएको छ।
अभियन्ताबाट राजनीतिक नेतृत्वसम्म
साम्पाङ २०६४ सालदेखि नै धरानमा खानेपानी व्यवस्थापन, भ्रष्टाचारविरुद्ध अभियान र नागरिक सहभागितामा केन्द्रित अभियन्ताका रूपमा सक्रिय थिए।
२०७९ सालमा स्वतन्त्र उम्मेदवारका रूपमा ‘लौरो’ चुनाव चिह्न लिएर धरानको मेयर निर्वाचित भएपछि उनले श्रमदान अभियानलाई व्यापक बनाए। खोला, सडक र नाली सफाइदेखि ढुंगा बोक्ने कामसम्ममा उनी आफैं सहभागी हुने गरेका कारण समर्थकहरूले उनलाई ‘श्रमपिता’ भनेर सम्बोधन गर्न थाले।
धरानमा पानी अभाव समाधानका लागि उनले कोकाहा खोलाबाट पानी ल्याउने अभियान सञ्चालन गरेका थिए, जसले स्थानीय स्तरमा उनलाई अत्यन्त लोकप्रिय बनायो।
पार्टी गठनको प्रक्रिया
दल दर्ताका क्रममा पार्टीमा २८ केन्द्रीय सदस्य र पाँच पदाधिकारी तोकिएका थिए।
- अध्यक्ष : हर्क साम्पाङ
- उपाध्यक्ष : देवराज लामा
- महासचिव : आरेन राई
- कोषाध्यक्ष : समिता राई
- प्रवक्ता : अरुण गुरुङ
मेयर पदमा रहँदा अन्य दलसँग सहकार्य गर्न कठिन भएको भन्दै साम्पाङले माघ ४ गते मेयर पदबाट राजीनामा दिएर पार्टी निर्माण अभियानमा लागेका थिए।
पूर्वी पहाडमा लोकप्रियता
साम्पाङको प्रभाव धरानमा मात्र सीमित नभई धनकुटा, तेह्रथुम, संखुवासभा, इलाम, पाँचथर र ताप्लेजुङसम्म फैलिएको देखिएको छ। उनका कार्यक्रममा हजारौं मानिस सहभागी हुने गरेका थिए।
सामाजिक सञ्जालमार्फत नागरिकसँग प्रत्यक्ष संवाद, भ्रष्टाचारविरुद्ध आवाज र साधारण जीवनशैलीले उनलाई अभियानकर्ताबाट राष्ट्रिय राजनीतिमा उदीयमान नेताको रूपमा स्थापित गरेको विश्लेषण गरिन्छ।
प्रत्यक्ष निर्वाचनमा सफलता
श्रम संस्कृति पार्टीले तीन निर्वाचन क्षेत्रमा विजय हासिल गरेको छ।
- सुनसरी–१ : हर्कराज राई (३४,७४१ मत)
- भोजपुर : ध्रुवराज राई (१६,६६३ मत)
- खोटाङ : आरेन राई (१६,६१२ मत)
समानुपातिकतर्फ पनि सफलता
समानुपातिकतर्फ पार्टीले ३ लाख ८५ हजार ७४८ मत (३.५८ प्रतिशत) प्राप्त गरेको छ। प्रत्यक्ष ३ र समानुपातिक ४ सिटसहित संसदमा कुल ७ सिट जित्दै पार्टी पाँचौँ ठूलो दल बनेको छ।
देशभरका १६५ निर्वाचन क्षेत्रमध्ये १०९ क्षेत्रमा उम्मेदवार उठाएको यो दलले पहिलो चुनावमै उल्लेख्य उपस्थिति देखाएको छ।
राजनीतिक विश्लेषकहरूका अनुसार श्रम, नागरिक सहभागिता र युवा नेतृत्वलाई आधार बनाएर उभिएको साम्पाङको यो नयाँ शक्ति पुराना दलहरूका लागि चुनौती बन्दै गएको छ।
प्रतिक्रिया