काठमाडौं — विशेष अदालत काठमाडौंले नेपाली कम्युनिष्ट पार्टीका सहसंयोजक माधव कुमार नेपालविरुद्ध दायर पतञ्जली जग्गा हिनामिना प्रकरण सम्बन्धी भ्रष्टाचार मुद्दामा साक्षी बुझ्ने आदेश जारी गरेको छ।
आइतबार न्यायाधीश नारायणप्रसाद पौडेल र डिल्लीरत्न श्रेष्ठको संयुक्त इजलासले उक्त आदेश जारी गरेको हो। अदालतको आदेशसँगै अख्तियार दुरुपयोग अनुसन्धान आयोग (एन्फोर्समेन्ट) अब मुद्दाका साक्षीहरूलाई विशेष अदालतमा पेश गर्नेछ।
यसअघि माघ ७ गते विशेष अदालतले मुद्दा सुनुवाइ क्रममा मिसिल झिकाउने आदेश दिइसकेको थियो। न्यायाधीश सुदर्शनदेव भट्ट र हेमन्त रावलको संयुक्त इजलासले पनि अख्तियारमा रहेको मुद्दासम्बन्धी फाइल झिक्न आदेश जारी गरेको थियो।
प्रहरीको छानबिन अनुसार, २०६६ माघ १८ मा नेपाल नेतृत्वको मन्त्रिपरिषद्ले पतञ्जलीलाई आयुर्वेदिक विश्वविद्यालयको नाममा काभ्रेमा ८१५ रोपनी जग्गा हदबन्दी छुटमा खरिद गर्न स्वीकृति दिएको थियो। तर, ५९३ रोपनीभन्दा बढी जग्गा खरिद भई ३५३ रोपनी १५ आना जग्गा काष्ठमण्डप बिजनेस होम्स प्रालिलाई बिक्री गरिएको थियो।
भारतीय योगगुरु रामदेवद्वारा सञ्चालित पतञ्जली योगपीठ तथा आयुर्वेद कम्पनीले उद्योग सञ्चालनको लागि जग्गा खरिद गरेको भए पनि सरकारी छानबिन समितिले यसलाई अपचलन ठहर गरेको थियो।
यस प्रकरणमा अख्तियारले माधव नेपालसहित ९३ जनाविरुद्ध भ्रष्टाचार मुद्दा दायर गरेको छ। नेपाल गत असारमा विशेष अदालतले तोकेको ३५ लाख रुपैयाँ धरौटी तिरेर रिहा भएका थिए।
प्रतिक्रिया