मोजताबा खामेनी घाइते भएको हल्ला, इरानी राष्ट्रपतिको छोराले भने– ‘सुरक्षित र स्वस्थ’

6

इरानका नयाँ सर्वोच्च नेता मोजताबा खामेनी युद्धका क्रममा घाइते भएको खबर फैलिरहेका बेला इरानी राष्ट्रपतिको छोराले उनी सुरक्षित र स्वस्थ रहेको दाबी गरेका छन्।

इजरायल र संयुक्त राज्य अमेरिकासँगको जारी तनावपूर्ण परिस्थितिका बीच यस्तो दाबी सार्वजनिक गरिएको हो।

इरानी राष्ट्रपतिको छोरा तथा सरकारी सल्लाहकार युसेफ पेजेस्कियानले बुधबार आफ्नो टेलिग्राम च्यानलमार्फत खामेनीको अवस्थाबारे टिप्पणी गर्दै उनी घाइते भएको खबर आफूले पनि सुनेको तर त्यसको पुष्टि नभएको बताएका छन्।

उनका अनुसार आफूले सम्पर्कमा रहेका केही व्यक्तिसँग सोधपुछ गर्दा खामेनी सुरक्षित रहेको जानकारी पाएका छन्।
उनले सामाजिक सञ्जालमा लेखेका छन्, “मैले मोजताबा खामेनी घाइते भएको खबर सुनेको थिएँ। मैले केही साथीहरूलाई सोधेको छु। उनीहरूले भगवानको कृपाले उहाँ सुरक्षित र स्वस्थ हुनुहुन्छ भन्ने बताएका छन्।”

यसअघि सरकारी टेलिभिजनले खामेनीलाई ‘रमजान युद्धका घाइते पूर्व सैनिक’ भनेर उल्लेख गरेको थियो। तर उनी कहिले र कसरी घाइते भएका हुन् भन्नेबारे स्पष्ट विवरण दिइएको थिएन।

मोजताबा खामेनी लामो समयसम्म इरानका सर्वोच्च नेता रहेका आयातुल्ला अली खामेनीका छोरा तथा सम्भावित उत्तराधिकारी मानिन्छन्।

फेब्रुअरी २८ मा इरानमाथि भएको अमेरिका–इजरायल संयुक्त आक्रमणमा अली खामेनीको मृत्यु भएपछि मोजताबालाई नयाँ सर्वोच्च नेताका रूपमा अघि सारिएको बताइएको छ। त्यस घटनापछि मध्यपूर्व क्षेत्रमा तनाव झन् बढेको छ।

५६ वर्षीय मोजताबा खामेनी सामान्यतः सार्वजनिक जीवनमा कम देखिने व्यक्तित्वका रूपमा चिनिन्छन्। उनी सार्वजनिक कार्यक्रममा विरलै देखिन्छन् र प्रायः औपचारिक कार्यक्रममा पनि कम बोल्ने नेताका रूपमा परिचित छन्।

सर्वोच्च नेता घोषणा गरिएपछि पनि उनले हालसम्म राष्ट्रलाई औपचारिक सम्बोधन गरेका छैनन् र कुनै लिखित वक्तव्य पनि सार्वजनिक भएको छैन। यसले उनको अवस्थाबारे विभिन्न अनुमानहरू फैलिन मद्दत गरेको छ।

यसैबीच अमेरिकी पत्रिका द न्युयोर्क टाइम्सले बुधबार प्रकाशित गरेको रिपोर्टमा तीन जना नाम नखुलाइएका इरानी अधिकारीहरूलाई उद्धृत गर्दै खामेनी घाइते भएको उल्लेख गरेको थियो।

रिपोर्टअनुसार उनको खुट्टामा चोट लागेको बताइएको छ। उनी सचेत अवस्थामा रहेको र सीमित सञ्चारका साथ अत्यन्त सुरक्षित स्थानमा बसिरहेको पनि उल्लेख गरिएको छ।