बिल गेट्सले एपस्टाइन फाइल्समा लागेको यौन सम्बन्ध र रोगको आरोप अस्वीकार

माइक्रोसफ्टका सह-संस्थापक तथा अर्बपति बिल गेट्सले रुसी महिलासँग यौन सम्बन्ध राखेको र यौन रोग लागेको भन्ने आरोप अस्वीकार गरेका छन्।

यो आरोप अमेरिकी यौन अपराधी जेफ्री एपस्टाइनसँग सम्बन्धित फाइलहरूमा उठाइएको थियो। गेट्सका प्रवक्ताले यी आरोपहरू पूर्णतया बेतुका र झूटा भएको बताएका छन्। उनका अनुसार, यी दाबीहरू गेट्सको छवि बिगार्न खोज्ने प्रयास हुन्।

जनवरी ३० मा, अमेरिकी न्याय विभागले एपस्टाइनसँग सम्बन्धित लगभग ३० लाख पृष्ठका कागजात, २ हजार भिडियो र १ लाख ८० हजार तस्बिर सार्वजनिक गरेको थियो। फाइलहरूमा एपस्टाइनले इमेलमार्फत गेट्सले यौन रोग लागेपछि एन्टिबायोटिक मागेको दाबी गरेको उल्लेख थियो। तर गेट्सका प्रवक्ताले यसलाई गलत ठहर गरेका छन्।

गेट्सले एपस्टाइनसँग भेटघाटमा पछुतो भएको बताएका छन् र कुनै पनि गलत काममा संलग्न नभएको बताए। २०१९ मा उनले स्पष्ट पारेका थिए कि एपस्टाइनसँग कुनै व्यावसायिक वा व्यक्तिगत सम्बन्ध नभएको र पार्टी वा निजी कार्यक्रममा कहिल्यै उपस्थित नभएको।

हालका रिपोर्ट अनुसार, गेट्स र एपस्टाइनको भेटघाट २०११–२०१३ को बीचमा भएको थियो, जसमा न्यूयोर्कको घरमा बस्नु र निजी विमानमा यात्रा गर्नु जस्ता गतिविधि समावेश थिए। गेट्सले यस सम्बन्धले आफ्नी पूर्व पत्नी मेलिन्डा फ्रेन्च गेट्ससँगको विवाहमा तनाव सिर्जना गरेको स्वीकार गरेका छन्।

गेट्स र मेलिन्डा १९९४ मा विवाह गरेका थिए र २०२१ मा सम्बन्ध विच्छेद भएको थियो। मेलिन्डाले गेट्सको एपस्टाइनसँगको सम्बन्धलाई सम्बन्ध विच्छेदको एक प्रमुख कारण बताएकी थिइन्।