थाइल्यान्डले सोमबार आफ्नो छिमेकी क्याम्बोडियामा हवाई आक्रमण सुरु गरेको छ। दुबै पक्षले सीमा विवादका कारण एकअर्कामाथि आरोप–प्रत्यारोप जारी राखेका छन्। यस झडपमा कम्तीमा एक थाइ सैनिकको मृत्यु भएको छ भने आठ जना घाइते भएका छन्।
यो घटना यस वर्षको गर्मीमा भएको पाँच दिन लामो लडाइँसँग जोडिएको छ, जसमा ४३ जनाको मृत्यु भएको थियो र दुबै पक्षका लगभग तीन लाख मानिस विस्थापित भएका थिए। त्यसपछिको शान्ति सन्धि लागू भए पनि अक्टोबरमा थाइल्यान्डले अमेरिकी राष्ट्रपति डोनाल्ड ट्रम्पको समर्थनमा भएको सम्झौता रोक्दा सीमा तनाव फेरि बढेको हो।
सीमावर्ती क्षेत्रका हजारौं नागरिकले आफ्ना घर छोड्न बाध्य भएका छन्। थाइल्यान्डको सुरिन प्रान्तका किसान वोरथमका अनुसार हालसम्म ३५ हजारभन्दा बढी नागरिक विस्थापित भएका छन्। क्याम्बोडियाका अधिकारीहरूले ओडर मियाँचे प्रान्तमा कम्तीमा १,१५७ परिवार सुरक्षित स्थानमा पुगेको बताएका छन्।
थाइल्यान्डको सेना अनुसार हवाई आक्रमण सैनिक लक्ष्यमा मात्र केन्द्रित गरिएको छ र नागरिकलाई असर नगर्न प्रयास गरिएको छ। तर क्याम्बोडियाले केही नागरिक घाइते भएको र घरमा आगो लागेको जनाएको छ।
यसअघि अमेरिका, चीन र मलेसियाले झडप रोक्न मध्यस्थता गरेका थिए। मलेसियाका प्रधानमन्त्री अनवार इब्राहिमले दुबै पक्षलाई शान्ति कायम राख्न र कूटनीतिक समाधान अपनाउन आग्रह गरेका छन्।
प्रतिक्रिया