काठमाडौँ — अनामनगरस्थित रुद्रमती (धोबीखोला) किनारमा रहेको विवादास्पद सात तले भवनमा आइतबार डोजर चलाइएको छ। संघीय सरकार र काठमाडौँ महानगरपालिकाको समन्वयमा उक्त संरचनाको केही भाग भत्काइएको हो।
घरधनी इन्द्र चाम्लिङले आफूले करिब पाँच वर्षअघि नक्सा पास गरी कानुनी प्रक्रिया पूरा गरेर भवन निर्माण गरेको दाबी गरेका छन्। उनले नियमित रूपमा कर तथा राजस्व तिर्दै आएको बताउँदै अचानक गरिएको डोजर कारबाहीप्रति आश्चर्य व्यक्त गरे।
“वडा कार्यालयबाट नक्सा पास गरेर सबै प्रक्रिया पुर्याएर बनाएको घरमा आज डोजर चल्नुले मलाई अचम्मित बनाएको छ,” चाम्लिङले भने। उनले प्रशासनको कार्यशैलीमाथि प्रश्न उठाउँदै उचित संवाद नभएको गुनासो गरे।
भवन भत्काउने कार्य भइरहँदा उनले प्रधानमन्त्री बालेन्द्र शाह (बालेन) लाई ‘देशभक्त नेता’ को रूपमा सम्मान व्यक्त गर्दै उनको काम गर्ने शैलीको प्रशंसा गरे पनि भेटघाट र छलफलको अवसर नपाएकोमा असन्तुष्टि जनाए। “हामीले उहाँलाई भेट्न धेरै प्रयास गर्यौँ, तर सफल हुन सकेनौँ,” उनले भने।
उनले भावनात्मक रूपमा टिप्पणी गर्दै भने, “म चाहन्छु कि नेपालका सबै सुकुम्वासीहरूको पनि यस्तै ७ तले घर होस् र उनीहरू पनि महलमा बस्न पाऊन्।”
उक्त भवनमा यसअघि मिडिया कार्यालय, स्पा तथा रेस्टुरेन्ट सञ्चालनमा रहेको बताइएको छ। महानगरका अनुसार खोला किनारको मापदण्ड उल्लङ्घन गर्दै स्वीकृत नक्साभन्दा बढी संरचना निर्माण गरिएको र सोही कारण कानुनी प्रक्रिया पूरा गरी अवैध भाग हटाइएको हो।
घरधनीले अदालतको आदेशको कुरा गरे पनि महानगरले भने आवश्यक प्रक्रिया पूरा गरेरै कारबाही गरिएको स्पष्ट पारेको छ।
प्रतिक्रिया