चीनले शनिबार देशको दक्षिणपश्चिमी सिचुआन प्रान्तस्थित शिचाङ्ग उपग्रह प्रक्षेपण केन्द्रबाट नयाँ मौसम उपग्रह अन्तरिक्षमा प्रक्षेपण गरेको छ। ‘फेङ्ग्युन–४–०३’ नामक उक्त उपग्रहलाई ‘लङ मार्च–३ बी’ रकेटमार्फत बिहान १२ बजेर ७ मिनेटमा (बेइजिङ समयअनुसार) प्रक्षेपण गरिएको हो।
चिनियाँ अधिकारीहरूका अनुसार प्रक्षेपणपछि उपग्रह निर्धारित कक्षमा सफलतापूर्वक प्रवेश गरेको छ। ‘फेङ्ग्युन–४–०३’ चीनले स्वदेशमै विकास गरेको अत्याधुनिक मौसम अवलोकन उपग्रह हो, जसले मौसम पूर्वानुमान, जलवायु अनुगमन, प्राकृतिक प्रकोपको प्रारम्भिक चेतावनी तथा वातावरणीय अवलोकनमा महत्वपूर्ण भूमिका खेल्नेछ।
उक्त उपग्रहमा जडान गरिएका उन्नत उपकरणहरूले बादलको अवस्था, वर्षा, आँधी, तापक्रम तथा वायुमण्डलीय गतिविधिहरूको सूक्ष्म र निरन्तर निगरानी गर्न सक्ने क्षमता राख्छन्। यसबाट प्राप्त तथ्याङ्कले जनजीवन सुरक्षा, कृषि उत्पादन, उड्डयन सेवा, जलस्रोत व्यवस्थापन तथा आपतकालीन व्यवस्थापनमा उल्लेखनीय योगदान पुर्याउने अपेक्षा गरिएको छ।
यो प्रक्षेपणसँगै ‘लङ मार्च’ रकेट शृङ्खलाको कुल उडान संख्या ६२१ पुगेको चिनियाँ अधिकारीहरूले जानकारी दिएका छन्। चीनले अन्तरिक्ष प्रविधिमा आफ्नो क्षमता थप विस्तार गर्दै मौसम तथा वातावरणीय अध्ययनलाई अझ प्रभावकारी बनाउने लक्ष्य लिएको बताइएको छ।
प्रतिक्रिया