जेनजी मुभमेन्ट नेपालले अर्थमन्त्री स्वर्णिम वाग्लेको भारत भ्रमणका क्रममा दिएको अभिव्यक्तिप्रति आपत्ति जनाउँदै तत्काल राजीनामा दिन माग गरेको छ। राजीनामा नदिए सरकारले उनलाई पदबाट बर्खास्त गर्नुपर्ने मुभमेन्टको माग छ।
मुभमेन्टका तर्फबाट विजय शाहले जारी गरेको प्रेस वक्तव्यमा वाग्लेको अभिव्यक्तिले नेपालको राष्ट्रिय स्वाभिमान, कूटनीतिक मर्यादा र सार्वभौमसत्ताको गरिमामाथि प्रश्न उठाएको दाबी गरिएको छ। अर्थमन्त्रीले परराष्ट्र नीतिको गरिमामा आँच पुग्ने अभिव्यक्ति दिनु उचित नभएको वक्तव्यमा उल्लेख छ।
मुभमेन्टले नेपाल–भारत सम्बन्ध समानता, पारस्परिक सम्मान र साझा हितमा आधारित हुनुपर्ने भन्दै राष्ट्रिय हित र स्वाभिमानमा सम्झौता गर्न नहुने जनाएको छ।
वक्तव्यमा सन् १९५० को नेपाल–भारत शान्ति तथा मैत्री सन्धि खारेज गर्नुपर्ने, लिपुलेक, लिम्पियाधुरा र कालापानीलगायतका विवादित भूभागसम्बन्धी समस्या समाधान गर्नुपर्ने तथा सुस्तालगायत सीमावर्ती क्षेत्रका समस्या अन्त्य गर्नुपर्ने माग गरिएको छ। त्यस्तै, त्रिभुवन अन्तर्राष्ट्रिय विमानस्थलमा सुरक्षा जाँचका नाममा राखिएको भारतीय सुरक्षा उपस्थिति हटाउनुपर्ने र विगतमा जस्तै नाकाबन्दी दोहोरिन नहुने मुभमेन्टको धारणा छ।
अर्थमन्त्रीजस्तो जिम्मेवार पदमा रहेका व्यक्तिको सार्वजनिक अभिव्यक्तिबारे जवाफदेहिता आवश्यक रहेको उल्लेख गर्दै मुभमेन्टले सरकारसँग स्पष्ट जवाफ माग गरेको छ।
‘राष्ट्रिय स्वाभिमानभन्दा ठूलो कुनै पद, व्यक्ति वा राजनीतिक स्वार्थ हुन सक्दैन,’ वक्तव्यमा भनिएको छ।
मुभमेन्टले राजीनामाको माग दोहोर्याउँदै उक्त वक्तव्य प्रधानमन्त्री तथा मन्त्रिपरिषद्को कार्यालय र नेपाली सेनाको मुख्यालयलाई समेत बोधार्थ पठाइएको जनाएको छ।
प्रतिक्रिया