नेविसंघ काँग्रेसबाट अलग हुने विषय केन्द्रीय समितिमा, विद्यार्थीहरुले गराए ध्यानाकर्षण

नेपाली कांग्रेसको भ्रातृ संस्था नेपाल विद्यार्थी संघ (नेविसंघ) का कार्यकर्ताहरूले संगठनभित्र पछिल्लो समय देखिएका गतिविधिप्रति गम्भीर चिन्ता व्यक्त गर्दै पार्टी नेतृत्वको ध्यानाकर्षण गराएका छन् ।आइतबार नेपाली कांग्रेस केन्द्रीय महामन्त्री गुरुराज घिमिरेलाई एक ज्ञापनपत्र बुझाउँदै उनीहरूले संगठनको ऐतिहासिक गरिमा र विधानको रक्षा गर्न माग गरेका हुन् ।

ज्ञापनपत्रमार्फत नेविसंघका आस्थावान कार्यकर्ताहरूले नेपालको लोकतान्त्रिक आन्दोलनमा संघले पुर्याएको योगदानको स्मरण गर्दै स्थापनाकालदेखि नै संगठनले कांग्रेसको आदर्श र सिद्धान्तलाई आत्मसात् गर्दै आएको उल्लेख गरेका छन् ।नेविसंघले आफुलाई काँग्रेसबाट अलग गर्ने निर्णय गरेको विषय केन्द्रीय समितिमा नेताहरुले उठाइरहेको बताउदै काँग्रेस प्रवक्ता देवराज चालिसेले यस बारेमा पार्टीले निर्णय लिने बताएका छन् । उनले भने- नेविसंघ, महिला संघ, तरुण दल लगायत पार्टीका भातृ संस्थाहरु पार्टीको विधान अनुसार निर्माण भएका संस्थाहरु हुन् । नेपाली काँग्रेसले निर्माण गरेका संस्था हुन् । पार्टीले निर्माण भएका संस्थाले आफु अलग भए भन्ने घोषणा गर्नु कति राजनीतिक, वैधानिक हुन्छ, त्यो भन्नेले बुझ्नुपर्ने कुरा हो । पार्टीको बैठकमा यो विषयले प्रवेश पाएको छ, यो पार्टी भित्रको अनुशासनको विषय हुन सक्छ । यो पार्टीको लक्ष्मण रेखा भन्दा बाहिर गएको विषय हो ।’