भारतको औपचारिक भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने र भारतीय प्रधानमन्त्री नरेन्द्र मोदीबीच नयाँ दिल्लीस्थित हैदराबाद हाउसमा विशेष भेटवार्ता भएको जनाइएको छ। नेपालमा नयाँ सरकार गठनपछिको राजनीतिक परिवेशबीच भएको यो भेटलाई महत्त्वपूर्ण राजनीतिक संवादका रूपमा हेरिएको छ।
भेटपछि प्रधानमन्त्री मोदीले आफ्नो सामाजिक सञ्जालमार्फत लामिछानेसँगको भेटप्रति खुसी व्यक्त गर्दै साझा समृद्धिका लागि सहकार्यको प्रतिबद्धता जनाएका छन्। उनले नेपाललाई भारतको ‘Neighbourhood First’ नीतिअन्तर्गत प्राथमिक साझेदार मुलुकका रूपमा उल्लेख गर्दै दुई देशबीचको सम्बन्धलाई थप सुदृढ बनाउन नयाँ नेतृत्वसँग सहकार्य गर्न इच्छुक रहेको बताएका छन्।
पाँचदिने भारत भ्रमणका क्रममा सभापति लामिछानेले भारतीय गृहमन्त्री अमित शाह, विदेशमन्त्री एस. जयशंकर तथा भारतीय जनता पार्टीका नेताहरूसँग पनि भेटवार्ता गरेको बताइएको छ। छलफलमा नेपाल–भारत सम्बन्ध, द्विपक्षीय सहकार्य तथा आपसी हितका विविध विषयमा संवाद भएको स्रोतहरूको दाबी छ।
नयाँ पुस्ताको नेतृत्वबीच भएको यो उच्चस्तरीय संवादलाई नेपाल–भारत सम्बन्धको आगामी दिशा र राजनीतिक कूटनीतिक समीकरणसँग जोडेर हेरिएको छ।
प्रतिक्रिया