ओलीको दाबी: ‘आउँदो महाधिवेशनमा म निर्विरोध अध्यक्ष बन्छु’

नेकपा एमालेका अध्यक्ष केपी शर्मा ओलीले आगामी ११औँ महाधिवेशनमा आफू पुनः निर्विरोध अध्यक्ष बन्ने विश्वा‌स व्यक्त गरेका छन्। बिहीबार आयोजित सम्पादकहरूसँगको विशेष छलफलमा ओलीले वर्तमान परिस्थितिले आफ्नो विरुद्ध प्रतिस्पर्धा गर्न कोही नउठ्ने संकेत गरेको दाबी गरे। उनले भने, “अहिलेको परिवेश हेर्दा मेरो विरोधमा कोही उठ्ने अवस्था देख्दिनँ। मलाई अझै पनि आशा छ—म निर्विरोध हुन्छु। यसो हुन सके नेतृत्व मूल्यांकनका हिसाबले राम्रो हुन्छ।”

ओलीले यस विषयमा आधिकारिक निर्णय भने शुक्रबार बस्ने पार्टी सचिवालय बैठकमा हुने बताए। एमालेको ११औँ महाधिवेशन नजिकिँदै गर्दा अध्यक्ष ओलीको यस्तो अभिव्यक्तिले पार्टीभित्रको शक्ति सन्तुलन, नेतृत्व निरन्तरता र संभावित आन्तरिक प्रतिस्पर्धाबारे थप चासो बढाएको छ।